ShQO-da páter alyp beremin dep alty adamdy aldaǵan alaıaq 56 mln teńge paıda kórgen

ÓSKEMEN. KAZINFORM – Shyǵys Qazaqstan oblysynda páter alyp beremin dep alty adamdy aldap soqqan alaıaq 56 mln teńge paıda kórgen.

Oblystyq Polıtsııa departamentiniń málimetine súıensek, alaıaqqa aldanǵan 6 adam polıtsııaǵa habarlasqan. Jábirlenýshiler memlekettik baǵdarlama arqyly arzanǵa baspana alyp beremin dep ýáde bergen áıelge iri kólemde aqsha bergenderin jetkizdi.

Tergeý barysynda belgili bolǵandaı, eń áýeli Óskemen turǵyny áriptesine óziniń anasy baspana alýǵa kómektese alatynyn aıtqan. Osylaısha, bul sóz «sarafan radıosy» arqyly ary qaraı tarap, osy qyzmetti paıdalanǵysy kelgen basqa adamdar da paıda bolǵan.

- Azamattar kúdiktige suraǵan aqshasyn bere salǵan. Alaıda ýáde etilgen páter kiltin sol kúıi almady. Keıinnen áıel múlde baılanysqa shyǵýyn toqtatqan. Jábirlenýshilerge keltirilgen jalpy shyǵyn 56 000 000 teńge, - delingen aqparatta. 

Qazirgi ýaqytta polıtsııa kúdiktini anyqtap, tergeý amaldaryn júrgizilip jatyr.

Eske salsaq, buǵan deıin Aqtóbede bank qyzmetkeri alaıaqtardyń aldyn orap ketkeni habarlanǵan.