ShQO-da paraqorlyq qylmysyna qatysty birneshe sheneýnik ustaldy
«QR Qorǵanys mınıstrliginiń aýmaqtyq bólimshesinde paraqorlyq faktisiniń joly kesildi. Sybaılas jemqorlyqqa qarsy is-qımyl ulttyq bıýrosynyń ShQO boıynsha departamenti Qorǵanys mınıstrliginiń «Aıagóz aýdandyq paıdalaný bólimi» respýblıkalyq memlekettik mekemesiniń bastyǵyna qatysty sotqa deıingi tergeý júrgizip jatyr. Ol respýblıkalyq memlekettik mekemeniń aýmaǵynda ornalasqan dúkenniń elektr jelilerine kedergisiz qosylý úshin jeke kásipkerden 300 myń teńge somasynda para aldy dep kúdikke ilindi. Kinásin tolyq moıyndaýyna baılanysty kúdikti qamaýǵa alynǵan joq. Tergeý jalǵasyp jatyr», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova Agenttikte ótken baspasóz máslıhatynda.
Onyń aıtýynsha, sonymen birge Ulttyq bıýro QR AShM AÓK Óskemen aýmaqtyq ınspektsııasynda júıeli sybaılas jemqorlyqtyń jolyn kesken.
«Jedel-izdestirý sharalaryn júrgizý barysynda QR Aýyl sharýashylyǵy mınıstrliginiń agroónerkásip kesheni Óskemen aýmaqtyq ınspektsııasynyń basshysy jáne ınspektsııanyń eki bas mamany tarapynan paraqorlyq faktisi anyqtaldy. Olar karantınge jatqyzylǵan ónimderge ruqsattama qujattaryn kedergisiz berý úshin kásipkerlik qyzmet sýbektilerinen júıeli negizde 30 myńnan 200 myń teńgege deıingi para aldy dep kúdikke ilindi», - deıdi ol.
Janna Bastarova sondaı-aq, Shyǵys Qazaqstan oblysynyń energetıka jáne turǵyn úı - kommýnaldyq sharýashylyq basqarmasynyń basshysyna qatysty sotqa deıingi tergeý júrgizilip jatqanynan habardar etti.
«Ol Altaı qalasynyń kóshelerin aǵymdaǵy jóndeý (quny 40,1 mln teńge) boıynsha memlekettik satyp alý konkýrsynda jeńimpaz retinde taný úshin kásipkerden 10 paıyzyn shegerý túrinde 4 mln teńge somasynda para alǵany úshin kúdikti dep tanylýda. Kúdikti ustalyp, Óskemen qalasy polıtsııa basqarmasynyń ýaqytsha ustaý ızolıatoryna qamaldy. Bultartpaý sharasyn qabyldaý máselesi sheshilýde. Tergeý jalǵasyp jatyr», - dedi Janna Bastarova.
