ShQO-da para alǵan departament basshysyna 5,4 mıllıon teńge aıyppul salyndy
ASTANA. QazAqparat - Óskemen qalasynda QR Ivestıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıteti ShQO boıynsha departamentiniń burynǵy basshysy men atalǵan vedomstvonyń bólim basshysy 300 AQSh dollary mólsherinde para alǵany úshin zańǵa tartyldy, dep habarlaıdy «QazAqparat» HAA tilshisi.
Sot materıaldaryna sáıkes, sottalýshy A. 2014 jyldyń qarasha aıynda atalǵan departamentke basshy bolyp kelgen. 2015 jyly ol óz buıryǵy boıynsha E.-ny atalǵan departamenttiń ónerkásiptik qaýipsizdikke qatysty memlekettik baqylaý bólimine jetekshi retinde taǵaıyndaǵan. 2017 jyldyń aqpan aıynda departament basshysynyń atyna óndiris salasymen aınalysatyn bir kompanııanyń óndiris nysanyn keńeıtý týraly ótinishi kelip túsedi. Jobany tekserý barysynda onyń maquldaýǵa laıyq emestigi anyqtalǵan. Alaıda A. men E. ózara sóz baılasyp, jobanyń kemshiligine kóz juma qaraǵany úshin kompanııa basshylyǵynan 300 AQSh dollaryn talap etken. Somany bólisip alǵanymen, qylmys barysynda ekeýi ShQO sybaılas jemqorlyqqa qarsy agenttiktiń qyzmetkerlerine ustalyp qalǵan.
Sotta aıyptalýshylar protsessýaldyq kelisimge keldi. Óskemen qalasynyń №2 sotynyń úkimimen QR QK 366-baby 3-bóligi 2-tarmaǵy boıynsha kináli dep tanylǵan sottalýshylar para retinde alǵan somasyn 70 eselep (6,3 mıllıon teńge) qaıtaratyn boldy. Departament basshysy bolǵan A. túpkilikti sot sheshimi boıynsha 5,4 mıllıon teńge somasynda aıyppul óteıdi. Sottalýshylardyń múlki tárkilenbegen, alaıda memlekettik qyzmette eńbek etýge ómir boıy quqyǵy shekteldi.
Aıan Bekenuly
