ShQO-da para alǵan aýdan ákiminiń orynbasary 3 jylǵa bas bostandyǵynan aıyryldy

NUR-SULTAN. QazAqparat – Shyǵys Qazaqstan oblysy Glýbokoe aýdany ákiminiń orynbasary 500 myń teńge para alǵany úshin 3 jylǵa bas bostandyǵynan aıyryldy, dep habarlaıdy QazAqparat tilshisi.

Bul týraly QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Qaısar Barjaqsynov osyndaı Antikor aqparat alańynda málim etti.

«28 qyrkúıekte Glýbokoe aýdandyq sotynyń úkimimen Shyǵys Qazaqstan oblysy Glýbokoe aýdany ákiminiń orynbasary Kımasov 3 jylǵa bas bostandyǵynan aıyryldy. Ol aýdandyq turǵyn úı-kommýnaldyq sharýashylyǵy bólimimen aýdandyq mańyzy bar joldardy kútip ustaý boıynsha memlekettik satyp alý shartyna qosymsha kelisim jasaǵany jáne oryndalǵan jumystar aktilerine kedergisiz qol qoıǵany úshin kásipkerden 500 myń teńge somasynda para aldy degen kúdikke ilindi. Kımasov ómir boıy memlekettik qyzmette qyzmet atqarý quqyǵynan aıyryldy», - dedi agenttik ókili.

Aıta keteıik, Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Qaısar Barjaqsynov bıýdjetten 40 mln teńge jymqyrdy dep aıyptalǵan Pavlodar qalasyndaǵy «Shańyraq» halyq shyǵarmashylyǵy jáne mádenı-demalys qyzmeti ortalyǵynyń basshysy sottalǵanyn habarlady.