ShQO-da para alǵan áskerı qyzmetker sheninen aıyryldy
ASTANA. QazAqparat - Shyǵys Qazaqstan oblysynda soty para alǵan áskerı qyzmetkerge úkim shyǵardy, dep habarlaıdy «QazAqparat» HAA QR Áskerı sotynyń baspasóz qyzmetine silteme jasap.
Usynylǵan aqparattarǵa sáıkes, Semeı garnızonynyń áskerı sotynda ShQO qorǵanys isteri jónindegi departamenttiń Besqaraǵaı aýdandyq qorǵanys isteri bólimi bastyǵyna qatysty qylmystyq istiń úkimi jarııalandy.
Qylmystyq istiń fabýlasy boıynsha, aıyptalýshy óziniń qyzmettik kabınetinde E esimdi azamattan onyń ákesi K-nyń áskerı bıletin jedel ári kedergisiz alyp berý úshin 50 myń teńge kóleminde para alǵan. Para alǵannan keıin D-ny sybaılas jemqorlyqqa qarsy qurylym qyzmetkerleri ustady.
Sottyń sheshimimen qorǵanys isteri jónindegi bólim basshysy 50 myń teńge kóleminde para alǵany úshin 2,5 mln teńge aıyppul tóleı otyryp, áskerı ataǵynan aıyrý úkimine kesildi.
Sot barysynda sottalýshy kinásin tolyqtaı moıyndady.
