ShQO-da para aldy degen kúdikpen 2 sýdıa ustaldy
ASTANA. QazAqparat - Shyǵys Qazaqstan oblysynda para aldy degen kúdikpen eki sýdıa ustaldy, dep habarlaıdy QazAqparat tilshisi.
«Sybaılas jemqorlyqqa qarsy is-qımyl ulttyq bıýrosynyń Shyǵys Qazaqstan oblysy boıynsha departamenti Óskemen qalasynyń sýdıasyna qatysty sotqa deıingi tergeý júrgizýde. Ol sottalǵanǵa jazanyń ótelmegen bóligin neǵurlym jeńil túrine aýystyrý týraly ótinishti oń qaraǵandyǵy úshin para aldy dep kúdikke ilindi. QR Qylmystyq-protsestik kodeksi 201-babynyń (sotqa deıingi tergep-tekserý derekterin jarııalaýǵa jol bermeý) talaptaryna sáıkes, sotqa deıingi tergep-tekserýdiń ózge derekteri tergeý múddesi úshin jarııa etýge jatpaıdy», - dedi búgingi brıfıngte Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova.
Ol sonymen birge, ShQO-da taǵy bir aýdandyq sot sýdıasy da para aldy degen kúdikpen ustalǵanyn aıtty.
«Sybaılas jemqorlyqqa qarsy is-qımyl ulttyq bıýrosynyń Shyǵys Qazaqstan oblysy boıynsha departamenti aýdandyq sottyń sýdıasyna qatysty qylmystyq is tirkedi. Tergeý zańsyz balyq aýlaýmen aınalysqan tulǵadan ákimshilik materıal boıynsha qaıyqty tárkilemeý úshin para aldy dep kúdiktelýde», - dedi ol.
