ShQO-da panoramalyq vagondar jobasy nege iske aspaıtyn boldy

ÓSKEMEN. KAZINFORM – 2025 jyly Óskemennen Rıdder jáne Altaı qalalaryna qatynaıtyn temirjolda panoramalyq vagondar iske qosylady dep josparlanǵan. Biraq joba iske aspaıtyn boldy. Kazinform tilshisi sonyń sebebin bilip kórdi.

Osydan eki jyl buryn oblys ákimdiginde ótken jınalysta ShQO-da týrıstik marshrýttar boıynsha panoramalyq vagondar iske qosylatyny aıtylǵan. 

Alǵashqy vagondar 2024 jyly relske shyǵady dep josparlanǵan. Dese de olaı bolmaı, jospardy iske asyrý 2025 jylǵa shegerildi.

Biraq bıyl da halyqtyń erekshe vagondarǵa otyra almaıtyny belgili boldy. Sonyń naqty sebebin bilý úshin Kazinform tilshisi ShQO jolaýshy kóligi jáne avtomobıl joldary basqarmasyna resmı saýalhat joldady.

— Búginde «Óskemen 1-Altaı», «Óskemen 1-Rıdder» áleýmettik mańyzy bar temirjol marshrýttarynda panoramalyq vagondardy iske qosý máselesi ózekti. Alaıda vagondardy iske qosý úshin bıýdjetten qarjy bólý máselesin pysyqtaý qajet. Premer-Mınıstrdiń 2025 jylǵy 15 aqpandaǵy tapsyrmasyna sáıkes qazirgi ýaqytta jergilikti atqarýshy organdarǵa bıýdjet shyǵynyn qysqartý jóninde shara qabyldaý tapsyrylǵan. Panoramalyq vagondardy satyp alýdy qarjylandyrý qoldanystaǵy zańnamaǵa sáıkes júzege asady, — dedi basqarmanyń jolaýshylar kóligi bóliminiń basshysy Qýanysh Akramov.

Basqarma ókilderinen ppanoramalyq vagondar jobasyn iske asyrýǵa qansha qarajat qajettigin de suradyq. Biraq naqty jaýap ala almadyq.

— 2015 jylǵy 24 aqpandaǵy tasymaldaýshynyń shyǵystaryn uzaqmerzimdi sýbsıdııalaý qaǵıdasy 13-tarmaǵynyń 5-tarmaqshasyna sáıkes, vagondardy satyp alý tasymaldaýshynyń óz qarajaty esebinen kózdeledi. Vagon satyp alýǵa jumsalǵan qarajat belgilengen qaǵıda sheńberinde tasymaldaýshyǵa óteletin bolady. Bul jobanyń qarjylyq turaqtylyǵyn qamtamasyz etýge jáne onyń uzaqmerzimdi iske asyrylýyna kepildik beredi, — deıdi Q.Akramov.

Eske salsaq, osyǵan deıin 120 tonnalyq vagondardy súıregen shymkenttik rekord ornatqanyn jazǵanbyz.