ShQO-da pandemııa bastalǵaly beri 24,5 myń adam koronavırýs juqtyrǵan
ÓSKEMEN. QazAqparat – Shyǵys Qazaqstan oblysynda pandemııa bastalǵaly beri 24,5 myń adam koronavırýs juqtyrǵan, dep habarlaıdy QazAqparat tilshisi.
Onlaın formatta ótken baspasóz konferentsııasy barysynda ShQO Densaýlyq saqtaý basqarmasynyń basshysy Ermek Omarbekov óńirdegi epıdemıologııalyq jaǵdaı týraly aıtyp berdi.
«Pandemııa bastalǵaly beri aımaqta SOVID-19 ınfektsııasyna shaldyqqan 24,5 myń adam tirkeldi. Búgingi tańda 3 544 ınfektsııalyq tósek-oryn bar. Onyń 319-y reanımatsııalyq jáne 490-karantındik. Statsıonarlarda 350 naýqas em alýda. Úsheýiniń jaǵdaıy óte aýyr. Tórt patsıent jasandy tynys alý apparatyna jáne 23-ókpeni ınvazıvti emes jasandy jeldetý qurylǵysyna qosylǵan. Infektsııalyq statsıonardan 12 220 patsıent jazylyp shyqsa, 7 121 adam ambýlatorııalyq em aldy», - dedi ol.
Jyl basynan beri aımaqta koronavırýstan 25 adam qaıtys bolǵan. Onyń 22 faktisi Semeı qalasyndaǵy juqpaly aýrýlar aýrýhanasynda tirkeldi. Sondyqtan oblys ákimi Danıal Ahmetovtyń tapsyrmasy boıynsha, 23-25 sáýir aralyǵynda naýqastardyń kóz jumýyna baılanysty arnaıy jumys toby Semeıge attanǵan bolatyn. Nátıjesinde juqpaly aýrýlar aýrýhanasynyń jumysyndaǵy kemshilikter anyqtaldy. Osyǵan oraı Semeı qalasy ákiminiń orynbasaryna, Densaýlyq saqtaý basqarmasy basshysynyń Semeı boıynsha orynbasaryna, sondaı-aq juqpaly aýrýlar aýrýhanasynyń bas dárigerine «qatań sógis» jarııalandy.
Búginnen bastap Semeıge oblys ákimi apparaty basshysynyń orynbasary Іlııas Muhamedjan bastaǵan jumys toby baryp, qala «jasyl» aımaqqa shyqqanǵa deıin sol jerde jumys isteıdi.
Sonymen qatar Ermek Omarbekov erteńnen bastap táýlik boıy úsh KT-apparat jumys isteıtinin aıtty. 15 mamyrǵa deıin isten shyqqan apparattardy jóndeý josparlanyp otyr.
