ShQO-da ózine qol jumsamaq bolǵan adamdardy qutqarǵan polıtseıler marapattaldy
NUR-SULTAN. QazAqparat - Shyǵys Qazaqstan oblysynyń polıtseıleri óńirdegi kóptegen turǵyndy sýıtsıdten aman saqtap qalǵan. Olardyń arasynda Saǵynysh Sábıqanov, Qanat Dáýithanov, Aslan Begádilov jáne Tımýr Jumanbekovterdiń erligin erekshe atap kórsetýge bolady. Keshe Semeıde erlik tanytqan polıtseılerdiń ekeýi marapattaldy, dep habarlaıdy «QazAqparat» tilshisi.
Naýryz aıynyń basynda óskemendik polıtseıler Saǵynysh Sábıqanov pen Qanat Dáýithanov bıik úıdiń terezesinen sekirmek bolǵan 24 jastaǵy jigittiń ómirine arasha tústi.
«Polıtseıler bir mınýtty da bosqa jibermeı, qajetti páterdi jyldam tapty. Olar 8-qabattaǵy páterge kóterilip, terezeniń syrtqy jaǵynda turǵan jigitti kóredi. Ol bastapqyda polıtseılerdiń aıtqanyn tyńdamaı, tómen sekiremin dep ses kórsete beredi. Biraq tergeýshi Saǵynysh Sábıqanov onymen tildesýdiń údesinen shyǵyp, terezeden sekirmeýge kóndirdi», - deıdi Shyǵys Qazaqstan oblystyq polıtsııa departamentiniń ókilderi.
Budan bólek, keshe polıtsııa general-maıory Janarbek Baqtybaev seń júrgen Ertiske batyp bara jatqan áıeldi qutqarǵan eki polıtseıdi tanystyrdy.
Oqys oqıǵa 27 sáýir kúni kúndizgi ekiler shamasynda bolǵan. Jańbyr quıyp turǵan sol kúni ózenniń aǵysy da qatty boldy.
ShQO polıtsııa departamenti baspasóz qyzmetiniń málimdeýinshe, áıel óz ómirin qııý maqsatynda ózenge kúmp bergen. Aǵysy qatty sý áıeldi birden aǵyzyp kete barǵan.
Radıo stansasynan dabyldy estigen polıtsııa kishi leıtenanty Aslan Begádilov pen polıtsııa serjanty Tımýr Jumanbekov oqıǵa ornyna shuǵyl jetken. Polıtseı Aslan Begádilov beline arqan baılap, ózenge sekiredi. Kúshke tolyp turǵan 23 jastaǵy jigit aryndap aqqan ózen tolqyndaryna yryq bermeı, áıeldi jaǵaǵa jetkizdi. Sol sátte jaǵada turǵan kómekshiler olardy sýdan shyǵaryp aldy. Osylaısha, polıtseıler áıeldiń ómirin saqtap qaldy.
Osy oqıǵadan keıin ShQO polıtsııa departamentiniń basshylyǵy QR Іshki ister mınıstrligine jumysyna adal qyzmetkerlerdi marapattaýǵa usyna ótinim jiberdi. Erjúrek polıtseıler «Sýǵa batqandardy qutqarǵany úshin» medalimen marapattaldy.
Shyǵys Qazaqstan oblystyq polıtsııa departamentiniń bastyǵy, polıtsııa general-maıory Janarbek Baqtybaev Semeı qalalyq basqarmasynyń erlik tanytqan qyzmetkerlerin marapattap, olardyń qyzmetine adaldyǵyn erekshe atap kórsetti.
Avtor: Aqbota Kúzekbaı
