ShQO-da ózendegi muz qatyp, bir aýyldy sý basý qaýpi týyndady

ÓSKEMEN. QazAqparat – Shyǵys Qazaqstan oblysy Glýbokoe aýdany Predgornoe aýylyndaǵy Pereplıýk ózeniniń arnasyna muz qatqan, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, ózendegi muzdyń qatýynan aýyldaǵy bes aýlany sý basý qaýpi týyndaǵan.

«Qutqarýshylar men jergilikti atqarýshy organdardyń ókilderi sý basýdyń aldyn alý úshin ınertti materıal salynǵan ydys-qapty ózen boıyna tósedi. Barlyǵy 50-den astam ydys-qap tóselgen. TJB jáne ákimdik qyzmetkerleri ózen mańynda baqylaý jumysyn júrgizip jatyr», - dep habarlady vedomstvo ókilderi.

Osy rette qutqarýshylar aýdan turǵyndaryna jer úıleriniń aýmaǵyn ýaqytyly qardan tazartyp, aryqqa qoqys tastamaý kerektigin eskertedi.