ShQO-da ózen sýy bógetten asyp ketti
ÓSKEMEN. QazAqparat - Shyǵys Qazaqstannyń Kúrshim aýdanynda tolassyz jańbyr saldarynan ózen sýy dambydan asyp ketti, dep habarlaıdy QazAqparat tilshisi.
Ózen sýy egindikke jaıylyp, Qazaqstan aýylyna aparatyn negizgi joldy shaıyp úlgerdi. Keshe keshten beri oqıǵa ornynda Kúrshim aýdandyq tótenshe jaǵdaı bóliminiń mamandary men jergilikti ákimdik ókilderi jumys isteýde.
«Tasyǵan sý eldi mekenderge qaýip tóndire qoıǵan joq. Bóget pen aýyldyń arasy 3 shaqyrym. Aýyldan 600 metr jerde sýraý kanaly bar. Dambynyń shlıýzderin japqan soń jaǵdaı turaqtaldy. Ázirge Qazaqstan aýylynyń negizgi joly jabyq. El aınalma jolmen qatynap jatyr» - deıdi aýdandyq tótenshe jaǵdaı bólimi basshysynyń mindetin atqarýshy Baýyrjan Orazǵalıev.
Sý alǵan jerlerdi qalpyna keltirý jumystaryna jergilikti ákimdikten 10 adam, tótenshe jaǵdaı qyzmetinen 6 adam tartylǵan. Boran aýyldyq okrýgine qarasty Qazaqstan aýylynda 270 adam turady.
