ShQO-da taýdyń opyrylýyna sebepker bolǵan kompanııa nege áli jazalanbaı keledi

ÓSKEMEN. KAZINFORM — Shyǵys Qazaqstan oblysynda Malaıa Karagýjıha ózeniniń lastanýy men Snegırıha taýynyń opyrylýyna qatysty tergeý áli  jalǵasyp jatyr.

Glýbokoe aýdanynda ornalasqan Malaıa Karagýjıha ózeni osy jyldyń jazynda qatty lastanǵan bolatyn. Al Snegırıha taýynyń opyrylǵan jeri 15 myń sharshy metrden asty. Oblystyń mamandandyrylǵan tabıǵat qorǵaý prokýratýrasy ózendegi aýyr metaldardyń shekti ruqsat etilgen kontsentratsııasy 83 myń ese joǵary ekenin anyqtady.

Buǵan ıÝbıleıno-Snegırıhınskoe ken orny aýmaǵynan shahta sýynyń ózdiginen aǵýy sebep bolǵan. Mamandardyń aıtýynsha, «Vostoktsvetmet» JShS kenishti japqanmen rekýltıvatsııa jumystaryn júrgizbegen.

— Belgili bolǵandaı, ken ornyn joıý kezinde kásiporyn rekýltıvatsııa jumystaryn qolǵa almaǵan, kenish aýmaǵyn burynǵy qalpyna keltirmegen. Al ýákiletti memlekettik organdardan quralǵan komıssııa ken orny joıylǵany jaıly qabyldaý aktisine qol qoıǵan, — dep habarlady prokýratýradan.

Ken ornyn joıýdy qabyldaý aktisi keıinnen sotpen zańsyz dep tanylyp, apellıatsııalyq sot bul sheshimdi ózgerissiz qaldyrdy. Dese de, osy istiń núktesi áli qoıylmaı otyr.

— Qazirgi tańda «Vostoktsvetmet» kásiporny shahta sýynyń aǵyp ketýiniń naqty sebebin anyqtaý úshin ǵylymı zertteýlerge kiristi. Sonyń nátıjelerine sáıkes kelesi qadamdar jasalady, — dep habarlady kompanııanyń baspasóz qyzmetinen.

ShQO Ekologııa departamenti basshysynyń mindetin atqarýshy Azamat Táýirbekov kompanııaǵa aýmaqqa keltirilgen zalaldy tolyq zertteý mindettelgenin málim etti.

— Bastapqyda kásiporynǵa qarasha aıyna deıin ýaqyt berildi. Biraq Shyǵys Qazaqstanda qar erte túsetindikten, qazan-qarasha aılarynda topyraq jamylǵysyn tolyq zerttep, sý qoımasy men sý asty álemine keltirilgen zalaldy baǵalaý múmkin bolmady. «Vostoktsvetmet» JShS ókilderi zertteý merzimin 2025 jyldyń mamyryna deıin uzartýdy surady. Osy zertteý aıaqtalǵannan keıin ǵana shyǵyn men aıyppuldyń naqty mólsheri anyqtalady, — dedi ol.

Eske salsaq, osyǵan deıin Pavlodarda Ertis ózeniniń deńgeıi kóterilip ketkeni habarlanǵan.