ShQO-da óz betimen altyn óndiretinder úshin qymbat metall qabyldaıtyn pýnktter ashyla ma

ÓSKEMEN. KAZINFORM — Shyǵys Qazaqstan oblysynda ótken jıynda altyn qazatyndar máselesi kóterildi.

ShQO altyn óndirýshiler qaýymdastyǵynyń ókilderi altyn qazýshylar jumysyn zańdastyrýdyń tıimdiligi týraly aıtty.

— Óz betimen altyn óndiretinder úshin altyndy resmı túrde ótkizýge múmkindik jasalýy kerek. Ákimdik qazýǵa lıtsenzııa bergen kompanııalar úshin áleýmettik korporatsııa nemese Ulttyq banktiń enshiles uıymdary arqyly qabyldaý pýnktterin uıymdastyraıyq. Altyn óndirýshiler maýsym boıy jumys istep, eń bolmasa 50-100 gramm altyn ótkizse, bul Qazaqstannyń altyn-valıýta rezervin tolyqtyrýǵa sep bolady. Jańa jumys oryndary da ashylady, — deıdi qaýymdastyq músheleri.

Bul usynysqa jaýap bergen ShQO ákiminiń orynbasary Darhan Sapanovtyń aıtýynsha, keı altyn óndirýshi jer qoınaýyna zalal keltiredi.

— Altyndy zańdy jáne zańsyz túrde qazatyndar bar. Ekologııa departamenti quqyq qorǵaý organdarymen birge únemi reıd júrgizedi. Bul máseleni túbegeıli sheshý úshin biz tıisti mınıstrliktermen, Úkimetpen, Prezıdent ákimshiligimen belsendi jumys istep jatyrmyz. Jaqynda osyǵan qatysty naqty usynystarymyzdy joldadyq. Onyń ishinde barlyq kásiporynnyń zańdy negizde jumys isteýin jáne rekýltıvatsııa mindettemelerin oryndaýyn talap etetin tetikter de bar. Qazir jerdi qalpyna keltirý eń ózekti másele bolyp otyr, — dedi ol.

Altyndy óz betimen óndiretinder úshin altyn qabyldaıtyn pýnktterdiń ashylatyndyǵy nemese ashylmaıtyndyǵy ákimdik usynystaryna naqty jaýap kelgennen keıin belgili bolmaq. 

Eske salsaq, osyǵan deıin ShQO zańsyz altyn óndirý boıynsha 9 qylmystyq is qozǵalǵany habarlanǵan.