ShQO-da oınap júrgen balalardy qar basyp qalyp, bireýi mert boldy
ShEMONAIHA. QazAqparat – Shyǵys Qazaqstan oblysynda oınap júrgen balany qar basyp, mert boldy, dep habarlaıdy QazAqparat ShQO Tótenshe jaǵdaılar departamentine silteme jasap.
Shyǵys Qazaqstan oblystyq Tótenshe jaǵdaılar departamenti taratqan aqparat boıynsha, 2 aqpan kúni Shemonaıha qalasynda 4 bala ózen jaǵasynda oınap júrgen. Olardyń ekeýin qar basyp qaldy.
«Qys boıy jınalǵan qardyń tómengi jaǵy qýystanyp, bos keńistik paıda bolǵan. 2004 jyly týǵan balany janynda júrgen balalardyń ózderi shyǵaryp alǵan, óıtkeni oǵan qar qulaǵanymen tolyq basyp qalmaǵan. Al qar basqan ekinshi balany taba almaǵan balalar kómek shaqyrǵan. Oqıǵa týraly habardar bolysymen qutqarýshylar birden iske kirisken. 2006 jyly týǵan balany qutqarýshylar da, jedel-qutqarý otrıadynyń kınologııalyq qyzmeti de, polıtseıler men jergilikti turǵyndar da izdegen. Artynan balany qar basqan aımaq qardan tazartyldy»,-dep túsindirdi ShQO TJD ókilderi.
Oqıǵa ornyna aýdannyń tótenshe jaǵdaılar jónindegi bólim bastyǵy Qurmash Daırov ta kelgen edi. Ol bul aımaqta qardyń óte tyǵyz ekendigin, sondyqtan qar jınalǵan jerdiń ekinshi sheti de qulaýy múmkindigin aıtty.
«Osy sebepti qardan tazalaý jumystary óte saq júrgizildi. Soǵan qaramastan qutqarýshylar qardy jyldam tazalaýǵa tyrysty. Qar tazalaý barysynda ıisshil ıtter balanyń jatqan jerin sezdi. Alaıda bul ýaqytta óte kesh bolatyn. 3 metr qalyńdyqtaǵy qardyń arasynan balanyń jansyz denesi tabyldy»,-dedi TJ departamentiniń ókilderi.
Qutqarýshylar qalyń qardyń qulaýy adam ómirine asa qaýipti ekenin eskertedi.
