ShQO-da otyz jylda 600-den astam halyqaralyq dárejedegi sport sheberi shyqty
ShQO Dene shynyqtyrý jáne sport basqarmasynyń málimetinshe, táýelsizdik jyldarynda Qazaqstan sporttyń keıbir túrlerinde laıyqty túrde aldyńǵy qatarda boldy. Bul ásirese boksqa qatysty. Olımpıada oıyndarynda boksshylarymyz el qorjynyna talaı medal ákeldi. Basqa da sport túrlerinde juldyzy janǵandar jeterlik. Mundaı sportshylardyń arasynda shyǵysqazaqstandyqtar az emes. Solardyń biri – jeńil atletıkanyń úsh qarǵyp sekirý túrinen olımpıada chempıony Olga Rypakova.
«Sportshynyń eren eńbegin moıyndap, Elbasynyń bastamasymen Óskemende Ortalyq Azııada teńdesi joq Olga Rypakova atyndaǵy jeńil atletıka maneji salyndy. Shyǵys Qazaqstanda Táýelsizdik jyldary 450-den astam jańa sporttyq nysan ashylǵan. Onyń ishinde 17 dene shynyqtyrý-saýyqtyrý jáne sport kesheni, bes tennıs korty, eki ıppodrom, úsh hokkeı modýli, úsh basseın, eki taý shańǵysy kesheni, 37 kúres zaly, 139 shaǵyn fýtbol alańy, 137 hokkeı qoraby, 102 strıt-vorkaýt sport alańy bar. Sonymen qatar Óskemende «Jekpe-jek« saraıy, ortalyq jabyq júzý basseıni, Semeıde kópfýnktsıonaldy mádenı-sport kesheni, sporttaǵy daryndy balalarǵa arnalǵan mektep-ınternat salynǵan», - delingen aqparatta.
Qazaqstandaǵy taǵy bir perspektıvti sport túri – voleıbol. 1991 jyldan bastap qazaqstandyq klassıkalyq jáne jaǵajaı voleıbolynyń sportshylary halyqaralyq arenada turaqty túrde júldeli oryndardy ıelenýde.
«Klassıkalyq voleıboldan Qazaqstan áıelder quramasy birneshe ret Azııa jáne Azııa oıyndarynyń, Azııa Kýbogynyń júldegeri bolyp, Olımpıada oıyndary men álem chempıonattaryna qatysty. Qazaqstan namysyn álemdik arenada elimizdiń bes dúrkin chempıony – «Altaı« ShQO áıelder voleıbol komandasy laıyqty qorǵap keledi. Bıyl voleıbolshylar alǵash ret Azııa chempıonatynyń jeńimpazy atanǵan. Endi klýbtyń aldynda 2024 jylǵy Olımpıada oıyndarynda ózin kórsetip, álemdegi eń myqty úsh klýbtyń qataryna kirý mindeti tur», - delingen habarlamada.
Shyǵys Qazaqstanda 30 jyldyń ishinde 11,5 myń sport sektsııasy qurylyp, onda 500 myńǵa jýyq adam shuǵyldanady. Óńirde sporttyń 94 túri boıynsha sportshylar jattyǵady. Onyń ishinde 37 olımpıadalyq, 16 paralımpıadalyq, 12 ulttyq jáne úsh tehnıkalyq sport túri bar. Táýelsizdik jyldarynda 600-den astam halyqaralyq dárejedegi sport sheberi, 1,6 myńnan astam sport sheberi, 6,5 myńǵa jýyq sport sheberine kandıdat daıarlandy.
