ShQO-da ótken jyly kezekte turǵan 523 kópbalaly otbasy baspanaly boldy

ÓSKEMEN. QazAqparat – Shyǵys Qazaqstan oblysynda 2019 jyly kezekte turǵan 523 kópbalaly otbasy baspanaly bolǵan, dep habarlaıdy QazAqparat.

Aımaq basshysy Danıal Ahmetov oblys ákimdiginde ótken jıyn barysynda kópbalaly otbasylarǵa qandaı qoldaý kórsetilip jatqandyǵyn aıtyp berdi.

«Óńirimizdegi 3,8 myń kópbalaly otbasynyń búldirshinderi balabaqshaǵa tegin baryp júr. Bul maqsatta 373 mln teńge bólingen. Sondaı-aq kópbalaly otbasydan shyqqan oqýshylar 100% mektep formasymen jáne ystyq tamaqpen qamtamasyz etildi», - dedi ákim.

Ótken jyly kezekte turǵan 523 otbasy qonys toıyn toılaǵan. Aldaǵy 3 jyldyń ishinde kezektegi barlyq kópbalaly otbasy baspanaly bolmaq.

«Alaıda biz masyldyqqa jol bermeýimiz kerek. Jumys isteýge qabileti barlar eńbek etýi tıis. Olarǵa jumys tabýǵa kómektesemiz. Jeke kásibin bastaǵysy kelgenderge de qarjylaı demeý kórsetilýde», - dedi Danıal Ahmetov.