ShQO-da otbasynda janjal shyǵarǵan 241 turǵyn esepke qoıyldy

ÓSKEMEN. QazAqparat – Shyǵys Qazaqstan oblysynyń polıtseıleri otbasynda janjal shyǵarǵan 240-tan astam adamdy esepke qoıdy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary 24 qańtardan bastap óńir aýmaǵynda «Turmys» jedel-aldyn alý sharasyn júrgizýde.

Ondaǵy maqsat – otbasyndaǵy zorlyq-zombylyqqa tosqaýyl qoıý.

«Úsh kún ishinde turǵylyqty jeri boıynsha 3 000-nan astam adam tekserilip, 934 quqyq buzýshylyq anyqtaldy. Barlyq faktiler boıynsha kináliler ákimshilik jaýapkershilikke tartyldy. Otbasynda janjal shyǵarǵan 241 adam esepke qoıyldy. Olarǵa qatysty qorǵaý nusqamalary shyǵarylǵan», - delingen aqparatta.

Polıtsııa qyzmetkerleri úıdegi zorlyq-zombylyqtyń aldyn alý maqsatynda 4 daǵdarys ortalyǵymen tyǵyz jumys isteýde.

Osyndaı ortalyqtardyń birinde zardap shekkenderge ýaqytsha turýǵa arnalǵan baspana bar.

«Daǵdarys ortalyǵyna ornalastyrylǵan adamdarmen profılaktıkalyq áńgimeler júrgiziledi. Sondaı-aq psıhologııalyq jáne áleýmettik kómek kórsetiledi. Turmystyq zorlyq-zombylyqqa tap bolǵandar dereý «102» arnasyna nemese 77-19-23 nómirine habarlasý qajet», - delingen málimette.