ShQO-da otbasylardyń tsıfrlyq kartasy jasala bastady
1 qyrkúıekten óńirde «Otbasynyń tsıfrlyq kartasy» jobasy pılottyq rejımde engizile bastady. Onda otbasylardyń ál-aýqatyna qaraı áleýmettik kepildikterdiń barlyq túrleri jekelendiriledi. Bul jaıly baspasóz máslıhaty barysynda ShQO Jumyspen qamtý jáne áleýmettik baǵdarlamalardy úılestirý basqarmasy áleýmettik tólemder bóliminiń basshysy Bulbul Qusmanova málim etti.
«Otbasynyń tsıfrlyq kartasyn qurýdyń negizgi maqsaty – qıyn ómirlik jaǵdaıdaǵy januıalardy anyqtaý. Karta oblystyń áleýmettik portretin jasaýǵa múmkindik beredi. Bul júıe arqyly otbasynyń materıaldyq, áleýmettik jaǵdaıyn, tabysyn, ómir súrý deńgeıi men ál-aýqatyn tolyqqandy bilýge múmkindik bar», – deıdi ol.
Bastapqy kezeńde memlekettik organdardyń aqparattyq júıeleriniń derekteri negizinde otbasylardyń ál-aýqatynyń deńgeıin jáne olarǵa belgilengen memlekettik qoldaý sharalaryn anyqtaý jumystary júrgizildi.
«Memlekettik qoldaý sharalaryn alý quqyǵyn belgileý kezinde azamattarǵa qyzmet kórsetýge kelisim alý úshin SMS habarlama jiberiledi. Osydan keıin járdemaqylar men tólemder taǵaıyndalyp, banktik shotqa aýdarylady. Joba kezeń-kezeńimen júzege asyrylady. 1 qyrkúıekten bastap jańa formatta 9 qyzmet túrin alý múmkindigi qarastyrylǵan. 2025 jyly memlekettik kepildikterdiń barlyq túrleri qamtylmaq», - dedi Bulbul Qusmanova.
