ShQO-da otbasynyń berekesin qashyrǵan 4 er adam sot sheshimimen úıinen qýyldy

ÓSKEMEN. KAZINFORM — Shyǵys Qazaqstan oblysynda turmystyq zorlyq-zombylyqqa barǵandarǵa jańa jaza qoldanyla bastady. Sot sheshimimen olar óz úılerinen ýaqytsha shyǵarylyp jatyr.

2025 jyldyń basynan beri óńir boıynsha osyndaı jazaǵa 4 er adam tartyldy.

— Zańǵa engizilgen ózgeristerge sáıkes, endi erli-zaıyptylar birneshe ret tatýlasa almaıdy. Eger quqyq buzýshylyq qaıtalansa, ýchaskelik polıtsııa ınspektorynyń ótinishi boıynsha sot agressordy úıden shyǵarý týraly sheshim shyǵara alady, — dep habarlady ShQO Polıtsııa departamentiniń jergilikti polıtsııa qyzmeti basqarmasyna qarasty otbasylyq-turmystyq zorlyq-zombylyqpen kúres bóliminen.

Óskemendegi daǵdarys ortalyǵynan bul tájirıbeniń oń nátıje kórsetip jatqanyn málim etti.

— Buryn zorlyq-zombylyq qurbandary ózderi úıden ketip, týystarynyń nemese tanystarynyń úıin panalap júretin. Bizdiń ortalyqqa da keletin. Endi zań ózgerdi. Osylaısha, áıelder bala-shaǵasymen sendelip júrmeıtin boldy, — deıdi ortalyq mamandary.

Bul shara bir jyl ishinde qaıtalanǵan quqyq buzýshylyqtar kezinde qoldanylady. Sotqa ótinishti ýchaskelik ınspektor joldaıdy.

Jalpy, jyl basynan beri oblysta 3 144 otbasylyq-turmystyq zorlyq-zombylyq faktisi tirkelgen. Bul ótken jylmen salystyrǵanda 10%-ǵa az.

Eske salsaq, osyǵan deıin ırandyq áıel 11 kúıeýin ýlap óltirgeni habarlanǵan.