ShQO-da Osınov asýyn aınalyp ótetin jol qashan paıdalanýǵa beriledi
ÓSKEMEN. KAZINFORM - Shyǵys Qazaqstan oblysynda Osınov asýyn aınalyp ótetin, Buqtyrma sý qoımasynyń jaǵalaýyna aparatyn jol qurylysyn 2026 jyldyń sońyna deıin aıaqtaý josparlanyp otyr.
Jańa baǵyt qaýipti taý serpantınimen júrmeı, tanymal týrıstik baǵyttarǵa qaýipsiz jetýge múmkindik bermek. Jol qurylysy shamamen 10 jylǵa sozyldy.
Jobanyń sozbalańǵa salynýyna merdigerlerdiń aýysýy, qarjylandyrýdyń jetkiliksizdigi jáne jobalaý kezinde jiberilgen qatelikter sebep boldy. Atap aıtqanda, bıik taýly aımaqtaǵy kópirdi salý kezinde topyraqtyń erekshelikteri tolyq eskerilmegendikten, tirek konstrýktsııalaryn ornatýda qıyndyqtar týyndaǵan. Keıinnen jobalyq sheshimder qaıta qaralyp, búginde bolashaq kópirdiń barlyq segiz tiregi turǵyzyldy.
Jobanyń jalpy quny — 19,9 mlrd teńge. Bıyl qurylysty aıaqtaýǵa 9,9 mıllıard teńge qarastyrylǵanymen, ázirshe sonyń tek 900 mıllıon teńgesi ǵana bólingen.
— Premer-mınıstrdiń tapsyrmasyna sáıkes, Qarjy mınıstrligine qalǵan 9 mlrd teńgeni bólý mindeti júkteldi. Bul másele jaqyn arada oń sheshimin tabady dep úmittenemiz, — deıdi «QazAvtoJol» UK» AQ ShQO fılıaly dırektorynyń orynbasary Almas Qasenov.
Jańa joldyń iske qosylýy jol qozǵalysynyń qaýipsizdigin aıtarlyqtaı arttyrady. Jaz mezgilinde demalys kúnderi ǵana Óskemennen Buqtyrma sý qoımasyna qaraı 20 myńnan astam avtokólik qatynaıdy. Jol paıdalanýǵa berilgennen keıin júrgizýshiler qaýipti Osınov asýyn aınalyp ótip, Altaı, Úlken Naryn jáne Katonqaraǵaı aýdandaryndaǵy týrıstik baǵyttarǵa áldeqaıda jyldam jete alady.
Eske salsaq, osyǵan deıin ShQO-da salynyp jatqan Qazaqstandaǵy eń bıik kópir qurylysyn aıaqtaýǵa qarjy áli bólinbegeni habarlanǵan.
