ShQO-da órttiń aldyn alý úshin qutqarýshylar dron arqyly baqylaý jasaýda
ÓSKEMEN. QazAqparat – Shyǵys Qazaqstan oblysynyń qutqarýshylary dala órtiniń aldyn alý úshin dron arqyly baqylaý jasaýda, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt qaýpi joǵary kezeń bastalǵaly beri óńirde shóp janýy kúrt ósti. Oblysta bir táýlik ishinde 30-ǵa jýyq dala órti aýyzdyqtalýda. Qutqarýshylar tilsiz jaýmen kúreske osy aıdyń basynan 100 tonnadan astam sý jumsaǵan.
«Jaǵdaıdy turaqtandyrý jáne halyqqa órt qaýipsizdigi erejelerin túsindirý úshin mamandar saıajaı ýchaskeleri boıynsha profılaktıkalyq reıd júrgizýde. Sondaı-aq qutqarýshylar ushqyshsyz ushý apparatyn paıdalanýda. 200 metr bıiktikke kóteriletin dron jalyn shyqqan jerdi tez tabady. Osynyń arqasynda órtti jan-jaqqa jaıylmaı turyp jyldam óshirýge múmkindik bar. Ekran arqyly 2,5-3 shaqyrym qashyqtyqtaǵy alańdy baqylaýǵa bolady», - delingen aqparatta.
Osy rette, departament mamandary órt qaýipsizdigi erejelerin buzǵan adamǵa QR ÁQBtK-niń 336-babyna sáıkes 20 AEK mólsherinde aıyppul salynatyndyǵyn eskertti.
