ShQO-da órtten kóz jumǵandar 20 paıyzǵa artty
ÓSKEMEN. QazAqparat – Shyǵys Qazaqstan oblysynda bıyl órtten kóz jumǵandar ótken jylmen salystyrǵanda 20 paıyzǵa artyp otyr, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha órt kezindegi ólim-jitim kóbeıdi. Osy jyly tilsiz jaýdan mert bolǵandar sany byltyrǵy kezeńmen salystyrǵanda 20 %-ǵa artqan.
«Jyl basynan beri órtten 18 adam kóz jumsa, onyń 14-i turǵyn úı sektorynda tirkelgen. Kóp jaǵdaıda jalyn otty abaısyz qoldanýdan shyqqan. Oblys aýmaǵynda oryn alǵan 285 órttiń 105-inde osy sebep. Al 78 órt – jylytý peshin paıdalaný kezinde qaýipsizdik talaptaryn saqtamaýdan, 69-y elektr jabdyǵyn qoldanǵanda qaýipsizdik erejelerin buzýdan bolǵan», - delingen aqparatta.
Aıta keteıik, 2022 jyldyń 3 aıynda peshti paıdalaný kezinde órt qaýipsizdigin saqtamaý saldarynan ıis tıgen 10 adam kóz jumyp, 39 turǵyn zardap shekti.
«TJD qyzmetkerleri qaýipsizdik maqsatynda 132 myńnan astam turǵyn úıdi aralap shyqty. Azamattarǵa erejelerdi saqtaý boıynsha nusqaýlyqtar berilip, 108 jıyn, 122 reıd ótkizildi», - delingen vedomstvo taratqan habarlamada.
