ShQO-da órtten gaz ballony jarylyp, bir adam mert boldy
ÓSKEMEN. QazAqparat - Shyǵys Qazaqstan oblysynyń Besqaraǵaı aýdanyna qarasty Buǵaz aýylynda shyqqan órtten bir adam mert boldy, dep habarlaıdy QazAqparat.
Tún ortasynda Buǵaz aýylynyń S.Seıfýllın kóshesinde ornalasqan úılerdiń birinen órt shyqqan. Úıdiń kireberistegi bólmesinen shyqqan órt as úıdegi gaz ballonyna jetip, alapat jarylys bolǵan.
Abyroı bolǵanda, úıdegi áıel úsh balasyn syrtqa shyǵaryp úlgeredi.
«Órt sóndirýshiler jetken kezde aǵashtan salynǵan úıdiń kóp bóligin jalyn shalǵan edi. Qutqarýshylar órttiń arasynan taǵy bir gaz ballony men 25 jastaǵy jigittiń denesin alyp shyqty. Mamandar qyzyl jalynmen 3 saǵat boıy arpalysty» - delingen oblystyq TJD baspasóz qyzmeti taratqan aqparatta.
Órt 90 sharshy metr aýmaqty qamtyǵan. Bastapqy boljam boıynsha jalynnyń shyǵýyna salǵyrttyq sebep boldy dep aıtylýda.
