ShQO-da órtengen úıde qalyp qoıǵan er adam qutqaryldy
ÓSKEMEN. QazAqparat – Shyǵys Qazaqstan oblysynda otqa oranǵan jer úıde qalyp qoıǵan er adam qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 22 jeltoqsanda saǵat 01.33-te Besqaraǵaı aýdanyndaǵy jeke turǵyn úıde órt shyqqan. Oqıǵa ornyna órt sóndirýshiler kelip jetkende dálizdi, esikti jáne úı shatyrynyń aǵash qurylymdaryna jaıylǵan jalynnyń jalpy aýmaǵy 60 sharshy metrge jetti.
«Qutqarýshylar órtengen úıden 1957 jylǵy er adamdy alyp shyqty. Oǵan birden alǵashqy medıtsınalyq kómek kórsetildi. Sondaı-aq úı ishinen 1 gaz ballony shyǵaryldy», - dep habarlady vedomstvo ókilderi.
Kóp uzamaı órt sóndirýshiler tilsiz jaýdy tolyqtaı aýyzdyqtaǵan. Aldyn ala málimet boıynsha órttiń shyǵýyna pesh jabdyqtaryn ornatý jáne paıdalaný kezinde qaýipsizdik erejelerin saqtamaý nemese otpen abaısyz áreket etý sebep bolýy múmkin.
