ShQO-da órtengen 1533 gektar orman qalpyna keltirilmek
ShQO ákimdiginde ótken jınalys barysynda órt qaýpi joǵary kezeńge daıyndyq jaıy sóz etildi.
«5 sáýirde órt qaýpi joǵary kezeń bastalady. Oblystaǵy ormanshylar men orman qorǵaý vedomstvolary jaraqtandyrý deńgeıi boıynsha respýblıkada tórtinshi orynda tur. Barlyǵy 161 tehnıka, tórt tikushaq bar, materıaldyq-tehnıkalyq baza únemi tolyqtyrylyp otyrady», - dedi aımaq basshysy Danıal Ahmetov.
Onyń aıtýynsha, ótken jyly barlyq qyzmetter orman órtteriniń aıtarlyqtaı aýmaqtarǵa taralýyna jol bermeı, qyzyl jalynǵa qarsy kúreste jaqsy nátıje kórsetti.
«Memleket basshysynyń tapsyrmasy boıynsha órtengen 1533 gektar ormandy qalpyna keltirýimiz qajet. Ol úshin qazirdiń ózinde kóshetter ósirilip, olardy qosymsha satyp alýǵa aqsha bólindi», - dedi oblys ákimi.