ShQO-da órt sóndirýshilerge jalǵan habar bergen er adam qoǵamdyq jumysqa jegildi

ÓSKEMEN. KAZINFORM — Shyǵys Qazaqstan oblysy Altaı aýdandyq sotynda tótenshe jaǵdaılar qyzmetine kórineý jalǵan qońyraý shalýǵa qatysty ákimshilik is qaraldy.

Belgili bolǵandaı, er adam Altaı qalasynyń órt sóndirý bólimine habarlasyp, Baıanovsk aýylynda turǵyn úı janyp jatqanyn aıtqan. Alaıda TJB qyzmetkerleri oqıǵa ornyna barǵanda bul aqparat jalǵan bolyp shyqqan.

Sot isti qaraı kele, atalǵan azamattyń buǵan deıin de Ákimshilik quqyqbuzýshylyq týraly Kodekstiń 438-baby (arnaıy qyzmetterge kórineý jalǵan shaqyrý) boıynsha ákimshilik jaýapkershilikke tartylǵanyn anyqtady.

«Onyń óz kinásin moıyndaýyn eskere otyryp, sot quqyqbuzýshyǵa 40 saǵattyq qoǵamdyq jumys jazasyn taǵaıyndady», dep habarlady sottan.

Eske salsaq, osyǵan deıin Almatyda jańa Konstıtýtsııaǵa qatysty feık aqparat taratqan turǵyn jazalanǵany habarlanǵan.