ShQO-da órt sóndirý bóliminiń júrgizýshisi 2 balany qutqaryp qaldy
ÓSKEMEN. KAZINFORM – Shyǵys Qazaqstan oblysy Ulan aýdanynda órtengen úıden 2 bala qutqaryldy.
ShQO Tótenshe jaǵdaılar departamenti baspasóz qyzmetiniń málimetine súıensek, Ulan aýdany Qasym Qaısenov kentindegi Amanjolov kóshesi boıynda ornalasqan besqabatty úıde órt shyqqan.
- 4-shi qabatyndaǵy páter janyp jatty. Sol kezde Óskemen qalasyndaǵy №3 órt sóndirý bóliminiń júrgizýshisi Qanat Qapanov jumystan tys ýaqytta jaqyndarynyń úıinde bolǵan. Kórshi páterden tútindi baıqaǵan ol dereý kómekke umtylyp, ishten 2 balany aman alyp shyqty. Sodan keıin tútin basqan podezden turǵyndardy evakýatsııalaýǵa kómektesti, - delingen aqparatta.
Órt sóndirýshiler kelgenge deıin qaýipti aımaqtan 80 adam óz betinshe shyǵyp úlgerdi. Al TJD qyzmetkerleri 4 adamdy, sonyń ishinde 2 balany evakýatsııalady.
Kóp uzamaı jalpy aýdany 45 sharshy metr qyzyl jalyn aýyzdyqtaldy. Órttiń shyǵý sebebi anyqtalyp jatyr.
Eske salsaq, osyǵan deıin TJM qyzmetkerleri Semeıdegi jańa kópirden sekirmek bolǵan er adamdy qutqarǵany habarlanǵan.