ShQO-da órt sóndirýshiler otqa oranǵan úıden múgedek adamdy qutqardy
ÓSKEMEN. QazAqparat – Shyǵys Qazaqstan oblysy Serebrıansk qalasyndaǵy órt shyqqan jer úıden 1963 jylǵy múgedek qutqaryldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, búgin Serebrıansk qalasyndaǵy Nekrasov kóshesinde ornalasqan jeke turǵyn úıde órt shyqqan. Oqıǵa ornyna qutqarýshylar shuǵyl kelip jetti.
«Jer úı shatyrynyń aǵash qurylymdaryn sharpyǵan qyzyl jalyn jaqyn mańdaǵy qosymsha ǵımaratqa da jaıylǵan. Kóp uzamaı qutqarýshylar jalpy aýdany 60 sharshy metrdi quraǵan órtti óshirdi. Sondaı-aq órt sóndirýshiler úı ishinde qalǵan 1963 jylǵy múgedek adamdy tereze arqyly syrtqa alyp shyqty», - dep habarlady vedomstvo ókilderi.
Aıta keteıik, tilsiz jaýdy aýyzdyqtaýǵa jeke quramnan 13 adam men 2 tehnıka jumyldyrylǵan. Aldyn ala málimet boıynsha órttiń shyǵýyna – otty abaısyz paıdalaný sebep boldy.
