ShQO-da órt sóndirýshiler otqa oranǵan úıden 3 gaz ballonyn shyǵaryp úlgerdi
ÓSKEMEN. QazAqparat – Shyǵys Qazaqstan oblysynyń órt sóndirýshileri qyzyl jalyn sharpyǵan úıden 3 gaz ballonyn shyǵaryp úlgerdi, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, Glýbokoe aýdany Progress aýylyndaǵy Chapaev kóshesinde ornalasqan jeke turǵyn úıde tańǵy saǵat 03.00 shamasynda órt shyqqan. Úı ıesi birden qutqarýshylarǵa qońyraý shaldy.
«Órt sóndirýshiler oqıǵa ornyna kelip jetkende úıdiń shatyryn, qabyrǵasyn, esik pen terezeni, jıhazdy, turmystyq tehnıkany sharpyǵan tilsiz jaý úı mańaıyndaǵy sharýashylyq qora-jaılarǵa da jaıyla bastaǵan. Órtti aýyzdyqtaý barysynda úıde jáne garajda gaz ballondary bar ekendigi belgili boldy. Sol kezde qaraýyl bastyǵy Elnar Kárimov, bólimshe komandıri Evgenıı Lantýh jáne bólim bastyǵy Andreı Borovıkov jyldam qımyldap, gaz ballondaryn syrtqa shyǵardy», - delingen habarlamada.
Kóp uzamaı órt sóndirýshiler jalpy aýdany 160 sharshy metrge jetken tilsiz jaýdy óshirdi. Aldyn ala málimet boıynsha órttiń shyǵý sebebi – elektr jabdyqtaryn montajdaý jáne paıdalaný kezinde órt qaýipsizdigi erejelerin saqtamaýdan bolýy múmkin.
