ShQO-da órt sóndirýshiler 4 saıajaı aýmaǵyn sharpyǵan jalyndy aýyzdyqtady
ÓSKEMEN. QazAqparat – Shyǵys Qazaqstan oblysy Rıdder qalasynda órt sóndirýshiler 4 saıajaı aýmaǵyn sharpyǵan qyzyl jalyndy aýyzdyqtady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 27 sáýirde túngi saǵat 02.00 shamasynda «Gromatýha» baý-baqsha qaýymdastyǵy aýmaǵyndaǵy tórt saıajaı ýchaskesinde órt shyqqan. Tilsiz jaý saıajaı men sharýashylyq qora-jaılardy sharpydy. Oqıǵa ornyna órt sóndirýshiler shuǵyl kelip jetken.
«Kóp uzamaı jalpy aýdany 90 sharshy metrdi quraǵan jalyn tolyqtaı óshirildi. Sondaı-aq qutqarýshylar qurǵaq shópti sharpyǵan 1 gektar aýmaqtaǵy órtti aýyzdyqtaǵan. Tilsiz jaýmen kúreske jeke quramnan 17 adam men 4 tehnıka jumyldyryldy», - dep habarlady vedomstvo ókilderi.
Anyqtalǵandaı, órt shóptiń janýynan bastalǵan. Jalynnyń shyǵýyna otty abaısyz paıdalaný sebep boldy.
