ShQO-da órt saldarynan 12 otbasy baspanasyz qaldy
ASTANA. QazAqparat - Shyǵys Qazaqstan oblysynyń Aıagóz aýdanynda órt boldy. Odan eshkim zardap shekpedi, dep habarlaıdy óńirlik TJD.
Órtti sóndirýge 20 qutqarýshy jáne úsh arnaıy tehnıka jumyldyryldy. Sondaı-aq olarǵa áskerı bólim qyzmetkerleri kómekke keldi.
«Órt bir kireberisi bar eki qabatty úıde tirkeldi. Munda 12 páter bar. Bastapqy málimet boıynsha jalyn birinshi jáne ekinshi qabat arasynda shyqqan. Alaý úıdiń shatyryn da sharpyǵan. Turǵyndar evakýatsııalandy. Baspanasyz qalǵan otbasylar ýaqytsha Aıagóz qalalyq qonaq úıine ornalastyryldy. Adamdar sany naqtylanýda. Qaýipsiz jerge kóshirilgender arasynda eshkim zardap shekpegen. Órt shalǵan aýmaq kólemi naqtylanýda», - dep habarlady oblystyq TJD-nyń baspasóz qyzmeti.
Órttiń shyǵý sebepterin anyqtaý úshin Óskemen qalasynan órt zerthanasynyń jedel synaq toby attandyryldy.
