ShQO-da órt qaýipsizdigi talaptaryn buzǵan 170-ten astam adam jaýapqa tartyldy
ÓSKEMEN. KAZINFORM – Shyǵys Qazaqstan oblysynda qutqarýshylar órt qaýpi joǵary kezeńde reıdterge shyǵyp jatyr.
Dala órtiniń aldyn alý maqsatynda oblys aýmaǵynda 48 mobıldi top jumys isteıdi. ShQO TJD qyzmetkerleri, polıtseıler jáne jergilikti atqarýshy organ ókilderi birlesip órt qaýpi joǵary kezeń bastalǵaly beri 620-ǵa jýyq profılaktıkalyq reıd ótkizdi.
- Sonyń barysynda mobıldi toptar aýmaqtardy patrýldep, turǵyndar arasynda túsindirý jumystaryn júrgizip, órt qaýipsizdigi talaptarynyń saqtalýyn baqylady. Júrgizilgen jumystardyń nátıjesinde 174 quqyq buzýshy ákimshilik jaýapkershilikke tartyldy, - dep habarlady ShQO Tótenshe jaǵdaılar departamentiniń baspasóz qyzmetinen.
Osy rette, qutqarýshylar turǵyndar men óńir qonaqtaryn órt qaýipsizdigi talaptaryn qatań saqtaýǵa shaqyrdy. Kún erekshe ysyp turǵan kezderde orman alqaptaryna barýdy shektegen jón.
Eger dalada nemese ormanda órt shyqqanyn baıqasańyz dereý «112» nómirine habarlasyńyz.
Eske salsaq, osyǵan deıin ShQO-da órt qaýpine baılanysty ormandardyń birine kirýge tyıym salynǵany habarlanǵan.
