ShQO-da órt qaýipsizdigi talaptaryn buzǵan 150-den astam adam jaýapqa tartyldy
ÓSKEMEN. KAZINFORM – Shyǵys Qazaqstan oblysynda bıyl órt qaýipsizdigi talaptaryn buzǵan 153 adam jaýapqa tartyldy.
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar orman alqaptaryndaǵy órt qaýipsizdiginiń saqtalýyn turaqty baqylap otyr.
– Órt qaýpi joǵary kezeń bastalǵaly beri oblys boıynsha 387 reıd júrgizildi. Sonyń nátıjesinde órt qaýipsizdigi talaptaryn saqtamaǵany úshin 153 adam ákimshilik jaýapkershilikke tartyldy. Sonymen qatar 95 dóńgelek ústel, turǵyndarmen 104 kezdesý jáne 1454 nusqama uıymdastyryldy. Reıdterdi quramyna órt sóndirýshiler, jergilikti atqarýshy organdardyń ókilderi, polıtsııa qyzmetkerleri men ormanshylar kiretin mobıldi toptar júrgizip jatyr, – delingen aqparatta.
Órt qaýpi joǵary kezeń bastalǵaly beri Shyǵys Qazaqstan aýmaǵynda jalpy aýdany 5,81 gektardy quraǵan 9 orman órti jáne 418 gektar aýmaqta 37 dala órti tirkeldi.
Qazirgi ýaqytta Óskemen qalasynda, Samar, Zaısan jáne Kúrshim aýdandarynda órt qaýiptiliginiń 5-synyby saqtalyp otyr.
Eske salsaq, osyǵan deıin bıyl memlekettik orman qorynda 0,41 gektar aýmaqty qamtyǵan 3 órt tirkelgeni habarlanǵan.
