ShQO-da órt qaýpine baılanysty ormanǵa barǵandarǵa aıyppul salynady
ÓSKEMEN. KAZINFORM – Shyǵys Qazaqstan oblysynda órt qaýpiniń kúrt artýyna baılanysty ormanǵa barýǵa shekteý engizilip jatyr.
Alǵashqylardyń biri bolyp shekteý Rıdder qalasynda engizildi. 4 mamyrdan bastap jergilikti orman qory aýmaǵynda órt qaýpiniń tórtinshi klasy belgilengen.
Osyǵan baılanysty turǵyndar men týrısterge ormanǵa barýǵa ýaqytsha tyıym salyndy. Shekteýler aýa raıy turaqtalyp, mol jaýyn-shashyn túskenge deıin óz kúshinde bolady.
Ormanshylardyń aıtýynsha, buǵan qurǵaq aýa raıy men órttiń jyldam taralý qaýpiniń joǵary bolýy sebep. Mundaı jaǵdaıda tipti kishkentaı ottyń ózi sanaýly mınýttar ishinde iri orman órtine aınalýy múmkin.
– Órt qaýpi joǵary kezeńde jeke tulǵalardyń memlekettik orman qory aýmaǵynda bolýyna tyıym salyndy. Talapty buzǵandarǵa ákimshilik jaýapkershilik qarastyrylǵan, - dep habarlady «Rıdder orman sharýashylyǵy» KMM.
Tyıym salynǵan kezeńde ormanda júrgeni úshin aıyppul mólsheri 10 AEK (43 250 teńge) quraıdy.
Eske salsaq, osyǵan deıin ShQO-da keıingi úsh jylda 117 orman jáne dala órti tirkelgeni habarlanǵan.
