ShQO-da órt qaýpine baılanysty ormandardyń birine kirýge tyıym salyndy
ÓSKEMEN. KAZINFORM – Shyǵys Qazaqstan oblysynda órt shyǵý qaýpiniń artýyna baılanysty Cheremshanka orman sharýashylyǵynyń orman alqabyna kirýge ýaqytsha shekteý engizildi.
«Cheremshanka orman sharýashylyǵy» KMM málimetinshe, memlekettik orman qory aýmaǵynda órt qaýpiniń IV klasy belgilengen. Osyǵan baılanysty orman alqabyna avtokólikpen kirýge jáne azamattardyń barýyna tyıym salyndy. Kirý joldaryna shlagbaýmdar qoıyldy.
– Aýdan turǵyndary men qonaqtarynan memlekettik orman qory aýmaǵyna kirmeýdi jáne engizilgen shekteýlerdi qatań saqtaýdy suraımyz. Bul sharalar orman órtteriniń aldyn alý, orman alqaptaryn saqtaý jáne azamattardyń qaýipsizdigin qamtamasyz etý maqsatynda qabyldandy, – delingen habarlamada.
Mamandardyń aıtýynsha, órt qaýpiniń IV klasy kezinde, ásirese aýa raıy qurǵaq ári jeldi bolǵan jaǵdaıda, tipti shaǵyn ǵana tutanǵan ottyń ózi qysqa ýaqyt ishinde úlken aýmaqqa taralýy múmkin.
Eske salsaq, osyǵan deıin bıyl Qazaqstanda 400-den astam orman órti tirkelgeni habarlanǵan.
