ShQO-da órt qaýipsizdigi erejelerin saqtamaǵan 13 adam jaýapqa tartyldy
ÓSKEMEN. QazAqparat – Shyǵys Qazaqstan oblysynda qutqarýshylar saıajaıdaǵy órttiń aldyn alý úshin arnaıy reıd júrgizdi, dep habarlaıdy QazAqparat tilshisi.
Órt qaýpi joǵary kezeń bastalǵaly beri Shyǵys Qazaqstanda shóptiń janýy jıilegen. Jaǵdaıdy turaqtandyrý jáne halyqqa órt qaýipsizdigi erejelerin túsindirý maqsatynda Óskemen qalalyq tótenshe jaǵdaılar basqarmasynyń mamandary saıajaı ýchaskeleri boıynsha profılaktıkalyq reıd uıymdastyrdy.
«Shara barysynda saıajaı ıelerine órt qaýipsizdigi erejeleri túsindirilip, talapqa baǵynbaǵandarǵa qarastyrylǵan jaýapkershilik týraly baıandaldy. ÁQBtK-niń 336-babyna sáıkes 13 azamat jaýapqa tartyldy. Sondaı-aq jaǵdaıdy baqylaý úshin mamandar ushqyshsyz ushatyn apparatty paıdalandy. 200 metr bıiktikte ushatyn dron órt qaýipsizdigi erejeleri buzylǵan ýchaskeni tez anyqtaýǵa múmkindik beredi. Ekranda jaǵdaıdy 2,5-3 shaqyrym qashyqtyqta baqylaýǵa bolady», - dep habarlady ShQO Tótenshe jaǵdaılar departamentiniń baspasóz qyzmeti.
Osy rette, qutqarýshylar óńir jurtshylyǵyna shóp órtemeı, baqylaýsyz qoqys jaqpaı, balalaryńyzdyń sirińkemen oınaýyna jol bermeý qajettigin eskertedi. Órt bolǵan jaǵdaıda dereý «101» nemese «112» nómirlerine habarlasý kerek.
