ShQO-da ormandy sharpyǵan órtti aýyzdyqtaýǵa 2 tikushaq tartyldy
ÓSKEMEN. KAZINFORM — Shyǵys Qazaqstan oblysynda orman órtin sóndirýge TJM tikushaqtary jumyldyryldy.
ShQO tótenshe jaǵdaılar departamenti baspasóz qyzmetiniń málimetine súıensek, Ulan aýdanyndaǵy «Aıýda» alqaby jáne «Asý-Bulaq» orman sharýashylyǵy aýmaǵy otqa oranǵan. Órttiń jalpy aýmaǵy anyqtalyp jatyr.
— Qazir sol jerde tilsiz jaýmen Ekologııa jáne tabıǵı resýrstar mınıstrliginiń ókilderi, TJD qyzmetkerleri kúresip jatyr. Sondaı-aq «Qazavıaqutqarý» mekemesiniń 2 tikushaǵy jumyldyryldy, — dep habarlady vedomstvo ókilderi.
Órtti sóndirý jaıaý toptardyń kúshimen júzege asyrylýda. Al tikushaqtardyń kómegimen áýeden sý tógý jumystary júrgizilip jatyr. Ormandy alqapta qurǵaq shóp, butalar men aǵashtar janǵan.
Eske salsaq, osyǵan deıin Almatydaǵy dámhanadan shyqqan órt 600 sharshy metr aýmaqty sharpyǵany habarlanǵan.
