ShQO-da ormanda sańyraýqulaq terip júrgen 83 jastaǵy áje adasyp ketken

ÓSKEMEN. QazAqparat – Shyǵys Qazaqstan oblysynda ormanda sańyraýqulaq terip júrip adasyp ketken 83 jastaǵy áje aman-esen tabyldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, Samar aýdandyq polıtsııa bólimine habarlasqan qyz 83 jastaǵy ájesiniń joǵalyp ketkenin aıtyp, kómek suraǵan.

Belgili bolǵandaı, olar týystarymen birge sańyraýqulaq terý úshin ormanǵa barǵan. Bir sátte kózden tasa bolǵan ájesi joǵalyp ketken.

Ózderi birneshe saǵat boıy izdegenimen odan esh nátıje bolmady. Sodan keıin týystary polıtsııaǵa habarlasýǵa sheshim qabyldaǵan.

«Tártip saqshylary is-qımyl josparyn quryp, orman alqabynda izdestirý jumystaryna kiristi. Sonyń nátıjesinde, bir saǵat ishinde zeınetker aman-esen tabyldy. Nemeresi ájesin tapqan polıtseılerge shyn júrekten alǵys bildirdi», - delingen aqparatta.