ShQO-da orman jáne dala órtteriniń 75 paıyzy naızaǵaıdan shyqqan
ShQO aımaqtyq kommýnıkatsııalar qyzmetinde ótken baspasóz máslıhaty barysynda qutqarýshylar órt qaýpi joǵarǵy kezeńdi qorytyndylady.
Sáýir aıynyń basynan beri óńir aýmaǵynda 76 orman órti shyqqan. Qyzyl jalyn 15645,52 gektar orman alqabyna jaıyldy. Sondaı-aq 105 ret dala órti tirkeldi.
«Órt sóndirýshiler úshin eń qıyn kez maýsym aıynda boldy. Qutqarýshylar bir aıda ormanshylarmen birge 100 ret órtpen kúresti. Ot aýyldarǵa birneshe ret jaqyndaǵanymen, der kezinde toqtatyldy», - dedi oblystyq TJD memlekettik órt baqylaý basqarmasynyń bastyǵy Nurjan Ómirjanov.
2023 jyly orman órtterin sóndirý úshin jedel den qoıý jasaǵyn qurý josparlanýda.
Bıyl óńirdegi barlyq orman jáne dala órtteriniń 75 paıyzy naızaǵaıdan, al qalǵan 25 paıyzy adamdardyń qateliginen nemese abaısyzdyǵynan shyqty.
«Naızaǵaıdan bolatyn órttiń aldyn alý múmkin emes. Sondyqtan ormandardy saqtaýdyń jalǵyz joly - órtti der kezinde aýyzdyqtap otyrý. Ol úshin baqylaý júıesin damytyp jatyrmyz. Naqty aıtqanda, ǵarysh arqyly monıtorıng jasalýda. Sonyń kómegimen 662 jylý núktesi anyqtalyp, dereý tıisti sharalar qabyldandy», - dep atap ótti Nurjan Ómirjanov.