ShQO-da orman sharýashylyǵy mekemeleri 112 kásipkerge óz mindetterin júktep, zańǵa qaıshy kelisimshart jasasqan
ÓSKEMEN. KAZINFORM – Shyǵys Qazaqstan oblysynyń prokýratýrasy orman sharýashylyǵy mekemeleriniń kásipkerlerge óz mindetterin júktep, zańǵa qaıshy kelisimshart jasasqanyn anyqtady.
ShQO mamandandyrylǵan tabıǵat qorǵaý prokýratýrasy orman sharýashylyǵy mekemeleriniń kásipkerlerdiń quqyqtaryn buzǵanyn anyqtady. Atap aıtqanda, orman ónimderin satyp alý-satý sharttaryn jasasý kezinde kásipkerlerge aǵash kesilgen jerlerdi tazalaý, júkterdi tasymaldaý kezinde buzylǵan joldardy óz qarajaty esebinen tıisti jaǵdaıda kútip ustaý syndy zańǵa qaıshy mindetterdi júktegen.
«Mysaly, «Rıdder orman sharýashylyǵy» QMM men jeke kásipker arasynda Úbi orman sharýashylyǵynda ornalasqan aǵash kesý ýchaskesinde dińgekke jaqyn jerde 197 tekshe metr aǵashty satý týraly kelisim jasaldy. Shart satyp alýshynyń ormanda paıda bolǵan qaldyqtardy tazartý, satyp alynǵan taýarlardy jáne onyń qaldyqtaryn kesý jáne saqtaý oryndaryn tazalaý mindetin qarastyrady. Alaıda aǵash kesý jáne sol ýchaskelerdi tazalaýdy orman sharýashylyǵy mekemesiniń ózi júzege asyrýǵa mindetti», - dep habarlady prokýratýranyń baspasóz qyzmeti.
Sondaı-aq shartta satyp alýshyǵa júkterdi tasymaldaý kezinde buzylǵan joldardy, kópirlerdi óz qarajaty esebinen kútip ustaý mindeti júktelgen. Biraq orman zańnamasyna sáıkes, bul jumysty da orman sharýashylyǵy mekemesi atqarýy tıis.
«Osyndaı zańbuzýshylyqtar kásipkerler men orman sharýashylyǵy mekemeleri arasynda jasalǵan 111 kelisimshartta anyqtalǵan. Tabıǵat qorǵaý prokýratýrasynyń den qoıýy nátıjesinde ShQO tabıǵı resýrstar jáne tabıǵat paıdalanýdy retteý basqarmasy negizsiz talaptardy joıý maqsatynda orman ónimderin satyp alý-satý sharttaryna tıisti ózgerister engizdi. Osylaısha, 112 kásipkerdiń quqyǵy qorǵaldy», - delingen aqparatta.
