ShQO-da orman órtiniń basym bóligi Katonqaraǵaı ulttyq parkinde tirkeldi

ÓSKEMEN. KAZINFORM – Shyǵys Qazaqstan oblysynda órt qaýip joǵary maýsymnyń qorytyndysy shyǵarylyp, órtterdiń negizgi sebepteri ataldy.

Óńirde jyl basynan beri 27 orman órti tirkelgen. Onyń jartysyna jýyǵy, naqty aıtqanda 12 órt Katonqaraǵaı ulttyq parkiniń aýmaǵynda bolǵan. 

Qalǵan 15 órt kommýnaldyq orman sharýashylyqtarynda shyqty. Bul týraly ShQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Qaırat Meırambekov málim etti. 

- Órtterdiń negizgi shyǵý sebebi – naızaǵaı. 27 órttiń 24-i qurǵaq shópke nemese aǵashqa túsken naızaǵaı saldarynan boldy. Tilsiz jaý lezde jan-jaqqa tarap ketedi, - dedi ol. 

Qyzyl jalyn sharpyǵan jalpy aýmaq – 203,9 gektar. Eń iri órt Zaısan orman sharýashylyǵynda sáýir aıynda bolǵan. Onyń aýdany – 172,7 gektar, sonyń ishindegi 1,4 gektary – orman alqaby.

Daıyndyq barysynda órtke qarsy 196 tehnıka men 3 myńnan astam qural-jabdyq ázirlengen.

Janar-jaǵarmaı qory, ıaǵnı 32,7 tonna dızel otyny jáne 50,88 tonna janarmaı tolyq jasaqtalǵan. 

Budan bólek, orman órtterin erte anyqtaý júıesin jetildirý boıynsha da birqatar jumys atqaryldy. Onyń ishinde antenna dińgekterin ornatýǵa arnalǵan 90 núkte anyqtalyp, «Qazaqtelekom» AQ mamandary 11 obektige zertteý júrgizdi.

Eske salsaq, osyǵan deıin Túrkistan oblysyndaǵy órtten zardap shekken balanyń jaǵdaıy aýyr ekendigi habarlanǵan.