ShQO-da orman órtiniń órshýine qasaqana órt qoıý sebep bolǵanyna esh dálel joq – vıtse-mınıstr

ÓSKEMEN. QazAqparat – Búgin Shyǵys Qazaqstan oblysynyń jurtshylyǵymen kezdesken QR Tótenshe jaǵdaılar vıtse-mınıstri Marat Kúldikov óńirde orman órtiniń órshýine qasaqana órt qoıýdyń sebep bolǵanyna esh dálel joqtyǵyn aıtty, dep habarlaıdy QazAqparat tilshisi.

Tótenshe jaǵdaılar vıtse-mınıstri Marat Kúldikovtiń aıtýynsha, bıyl kún qatty ysyp, jeldiń kúsheıýi saldarynan tamyz-qyrkúıek aılarynda respýblıkanyń barlyq derlik aımaǵynda iri tabıǵı órtter bolǵan. Onyń ishinde eń kóp zardap shekken Qostanaı, Shyǵys Qazaqstan, Qaraǵandy, Aqmola jáne Almaty oblystary.

«Shyǵys Qazaqstan oblysynda 2022 jyly orman órti 38%-ǵa artyp otyr. Sondaı-aq shóp órti 1,9%-ǵa, dala órti 33%-ǵa ósken. Qyrkúıek aıynyń basynda óńirdiń birneshe jerinde bir ýaqytta órt órshigen bolatyn. Jeli ekpindi jáne tehnıkanyń jetýi qıyn taýly aımaq bolǵandyqtan tilsiz jaýdy aýyzdyqtaý qıyndyq týdyrdy. Sondyqtan tikushaqtar da tartylǵan», - dedi vıtse-mınıstr.

Onyń aıtýynsha, osy órtterdiń shyǵý sebebin anyqtaý úshin mınıstrlikpen jáne QR ІІM qyzmetkerlerimen tolyqqandy tergeý júrgizilgen. Alaıda órttiń órshýine qasaqana órt qoıýdyń sebep bolǵanyna esh dálel tabylmady.

«Anyqtalǵandaı, órt qaýipsizdigi talaptarynyń saqtalmaýynan jáne otty abaısyz qoldanýdan jalyn shyqty. Sondaı-aq naızaǵaı saldarynan da órt bolǵan. Jalpy, bireýdiń qasaqana órt qoıýyn dáleldeýdiń ózi óte qıyn protsess», - dedi Marat Kúldikov.