ShQO-da orman órtin sóndirýshiler qandaı qıyndyqtarǵa tap bolǵanyn aıtty
ÓSKEMEN. QazAqparat – Shyǵys Qazaqstan oblysyndaǵy órt sóndirýshiler «Semeı ormany» rezervatyndaǵy qyzyl jalyndy óshirýde qandaı qıyndyqtar bolǵanyn aıtyp berdi, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, 23 sáýir kúni Besqaraǵaı aýdany aýmaǵyndaǵy «Semeı ormany» memlekettik orman tabıǵı rezervatynda órt shyqqany jaıly habar túsken. Birden sol jerge Baıdaýletov orman sharýashylyǵynan 34 adam, 6 avtotsısterna jáne 2 traktor jiberildi.
Sondaı-aq, jalyn sharpyǵan aýmaq MI-2 tikushaǵy arqyly baqylanyp, oqıǵa ornyna órt sóndirýshiler men avarııalyq-qutqarý qyzmetiniń kúshteri jumyldyrylǵan. Jalpy sol jerde oblystyq Tótenshe jaǵdaılar departamentiniń órt sóndirý qyzmetinen - 93 adam jáne 23 tehnıka, TJ komıtetinen - Kókshetaý garnızonynyń 39 adamy men MI-26 tikushaǵy tilsiz jaýmen kúresti.
«Qatty jeldiń saldarynan órt qylqan japyraqty aǵashtarǵa tez taralyp ketken. Al mundaı aǵashtar óte jyldam janady. Joǵary temperatýra men qoıý tútinge baılanysty keıbir oshaqtarda tilsiz jaýdy aýyzdyqtaý qıynǵa soqqan. Jeke quram men tehnıkaǵa qaýip tóndi. Biraq biz barynsha abaılap, saqtyq sharalaryn qatań saqtadyq», - deıdi órt sóndirý jetekshisiniń kómekshisi Anatolıı Jýkov.
Órt 25 sáýir kúni saǵat 19-00-de óshirildi. Qyzyl jalyn sharpyǵan aýmaq 3 948 gektardy quraıdy. Órtti sóndirýge jumyldyrylǵan Shyǵys Qazaqstan jáne Aqmola oblystyq Tótenshe jaǵdaılar departamentteriniń mamandary men tehnıkalary turaqty ornalasqan jerlerine oralǵan.
Esterińizge sala ketsek, 23 sáýirde Shyǵys Qazaqstanda qaraǵaıly ormannyń órtenip jatqandyǵy habarlanǵan. Kelesi kúni órtti sóndirý úshin Kókshetaýdan MI-26T alyp tikushaǵy ushyp shyqqan bolatyn.
24 sáýirde órttiń taralýy toqtatylyp, 25-i kúni tilsiz jaý tolyqtaı aýyzdyqtalǵan.
