ShQO-da onlaın-kazıno men qarjy pıramıdalaryna qatysty 400-den astam saıt buǵattaldy

ÓSKEMEN. KAZINFORM – Shyǵys Qazaqstan oblysynda zańsyz qumar oıyndar, qarjy pıramıdalary men kúmándi krıptoaıyrbastaý qyzmetterin usynatyn júzdegen ınternet-resýrs buǵattaldy. Sonymen qatar áleýmettik jelilerde zańsyz utys oıyndaryn uıymdastyrýshylarǵa iri kólemde aıyppul salyna bastady.

narkosaıt, noýtbýk, moshennıkı, moshennıchestvo
Foto: Freepik

ShQO boıynsha Ekonomıkalyq tergep-tekserý departamentiniń málimetine súıensek, qazirgi ýaqytta negizgi jumys oıynshylar men salymshylardy tartý arnalaryna baǵyttalǵan. Jyl basynan beri departament qyzmetkerleri buǵattaý úshin 155 kúmándi siltemeni joldaǵan. Onyń 124-i boıynsha qoljetimdilik shektelgen.

Atalǵan siltemelerdiń 41-i ınternet-kazıno belgileri bar platformalarǵa tikeleı baǵyttasa, taǵy 103-inde zańsyz onlaın oıyndardyń jarnamasy ornalastyrylǵan. Budan bólek, óńirde qarjy pıramıdalary men zańsyz krıptoaıyrbastaý qyzmetteriniń belgileri bar 300 saıt buǵattaldy.

- Saıtty buǵattaý - tekserýdiń sońy emes. Jedel qyzmetkerler zańsyz shemalardy uıymdastyrýshylardy anyqtaýǵa basymdyq berip otyr. Olardyń qatarynda áleýmettik jelilerde qumar oıyndardy kádimgi utys oıyndary retinde kórsetip, jasyratyn tulǵalar da bar, - delingen aqparatta.

2025 jyly QR ÁQBtK-niń 445-1-baby boıynsha, lotereıa qyzmeti týraly zańnamany buzǵany úshin oblysta 17 adam ákimshilik jaýapkershilikke tartylǵan. Bıyl da bul baǵyttaǵy jumys jalǵasyp jatyr. Qazirdiń ózinde óńirdiń úsh turǵynyna jalpy somasy bir mln teńgeden asatyn aıyppul salyndy.

Taǵy úsh derek boıynsha kinálilerdi QR ÁQBtK-niń 445-1-babynyń 6-bóligine sáıkes jaýapkershilikke tartý úshin materıaldar joldanǵan. Sonyń bireýi boıynsha sot sheshimi shyǵyp, qalǵan eki is qaralyp jatyr.

- Aqparattyq keńistiktegi quqyqqa qaıshy kontentti anyqtaý jáne buǵattaý jumystary turaqty túrde júrgizilip jatyr. Bul rette ınternet-kazıno men qarjy pıramıdalarynyń ózine ǵana emes, olardy jarnamalaý arnalaryna, lotereıa operatory mártebesinsiz zańsyz utys oıyndaryn ótkizý derekterine de erekshe nazar aýdarylǵan, - delingen habarlamada.

Eske salsaq, buǵan deıin ınternet-kazınolarǵa 191 mlrd teńge aýdarýǵa kómektesken toptyń isi sotqa joldanǵany habarlanǵan.