ShQO-da onkologııalyq aýrýlardy emdeýdiń 13 zamanaýı ádisi engizildi
ÓSKEMEN. QazAqparat – Shyǵys Qazaqstan oblysynda ótken jyly onkologııalyq aýrýlardan 5440 naýqas emdelip shyqty, dep habarlaıdy QazAqparat tilshisi.
Shyǵys Qazaqstanda 2020 jyly onkologııalyq naýqastar sany 20 538 adamdy quraǵan. ShQO Kópsalaly onkologııa jáne hırýrgııa ortalyǵy dırektory Gúlmıra Saǵıdýllınanyń aıtýynsha, onkologııalyq aýrýlarǵa shaldyqqandar úmitterin úzbeý kerek. Sebebi óńirde qaterli isikterden bolatyn ólim-jitim jyl saıyn azaıyp keledi. Bul kórsetiletin mamandandyrylǵan kómektiń sapasy men dertti ýaqytyly anyqtaýdyń nátıjesi.
«Ótken jyly Kópsalaly onkologııa jáne hırýrgııa ortalyǵynda 5 440 naýqas emdelip shyqty. 2 myńnan astam ota, sáýlelik dıagnostıka bólimshesinde 16 myńnan astam jáne ortalyqtyń úsh zerthanasynda 300 myńǵa jýyq zertteý júrgizildi. Sondaı-aq mamandandyrylǵan onkologııalyq kómek kórsetýdiń 13 zamanaýı ádisi engizildi. Atap aıtqanda, kókirek jáne kókirek qýysy aǵzalarynda vıdeoasıstırlengen torakoskopııalyq otalar», - dedi Gúlmıra Saǵıdýllına.
Onkologııalyq protsestiń damýyn ustap turýǵa kómektesetin targettik terapııanyń tórt jańa jelisi engizilgen. Naýqastardyń denesinde 1 jyldan 5 jylǵa deıin turatyn ári qalypty ómir saltyn júrgizýge esh kedergi jasamaıtyn port sıstema men pıklaın kateterleri ornatylýda. 2020 jyldyń qyrkúıeginen bastap atalǵan kateterler 13 naýqasqa qoıyldy.
«Sonymen qatar el ishinde tek Kópsalaly onkologııa jáne hırýrgııa ortalyǵynda qoldanylatyn serpindi ınvazıvti emes emdeý ádisin, ıaǵnı, MRgFUS magnıtti-rezonansty tomografııasynyń baqylaýymen fokýstalǵan ýltradybys ablıatsııasyn erekshe atap ótken jón. Bul qýyq asty bezin, súıek metastazdaryn jáne jatyrdyń túzilimderin emdeýdiń tıimdi tásili. Magnıtti-rezonanstyq tomograftyń baqylaýymen ýltradybystyq tolqyndardyń baǵyttalǵan energııasy qaterli isikti qyzdyryp, saý terilerge áser etpesten, ony joıýǵa yqpal etedi», - dedi ortalyq dırektory.
