ShQO-da onkologııalyq aýrýlardan ólim-jitim 15,3%-ǵa azaıdy
ÓSKEMEN. QazAqparat – Shyǵys Qazaqstan oblysynda onkologııalyq aýrýlardan ólim-jitim 15,3%-ǵa azaıdy, dep habarlaıdy QazAqparat tilshisi.
ShQO densaýlyq saqtaý basqarmasynyń málimetine súıensek, óńirdegi qaterli isikpen kúresýdiń besjyldyq keshendi josparynyń qorytyndysy shyǵaryldy.
2018 jyly «Qaterli isikke qarsy kúres» atty keshendi jospar qurylyp, sol boıynsha jumys bastaldy. Shyǵys Qazaqstan oblysy kóp jyldar boıy qaterli isikke shaldyǵý kórsetkishi boıynsha respýblıkada aldyńǵy orynda keledi.
Aımaqta jyl saıyn orta eseppen 2500 jańa qaterli isik aýrýy anyqtalady. ShQO-da dıspanserlik esepte 13,5 myń onkologııalyq naýqas bar.
«Ótken jyly oblys boıynsha aýrýshańdyq deńgeıi 100 myń halyqqa shaqqanda 350,4 qurady, bul respýblıkalyq kórsetkishten 76%-ǵa joǵary. 2018 jylmen salystyrǵanda aýrýshańdyq kórsetkishi 11,7%-ǵa ósti. Qaterli isik aýrýlarynyń kóbeıýi skrınıngtik baǵdarlamalar tıimdiliginiń artqanyna jáne turǵyndardy profılaktıkalyq tekserý sııaqty faktorlarǵa baılanysty bolyp otyr. Naýqastar arasynda erlerge qaraǵanda áıelder kóp», - deıdi basqarma basshysy Gúlmıra Saǵıdýllına.
Sońǵy bes jylda óńir boıynsha onkologııalyq aýrýlardan ólim-jitim 15,3%-ǵa azaıdy. Bul kórsetkishtiń tómendeýine qaterli isikterdi erte anyqtaý boıynsha skrınıngtik sharalar, onkologııalyq kómek kórsetýdiń biriktirilgen modelin engizý, medıtsınalyq qyzmetkerlerdiń biliktiligin arttyrý jumystary yqpal etti.
