ShQO-da onkologııalyq aýrýlardan bolatyn ólim-jitim azaıdy
ÓSKEMEN. KAZINFORM – Shyǵys Qazaqstan oblysynda onkologııalyq aýrýlardan bolatyn ólim-jitim 7,9 paıyzǵa tómendedi.
Bul týraly Óńirlik kommýnıkatsııalar qyzmetinde ótken brıfıng barysynda ShQO densaýlyq saqtaý basqarmasynyń shtattan tys bas onkology Gúlmıra Sagıdýllına málimdedi.
Onyń aıtýynsha, ólim-jitim kórsetkishi 100 myń turǵynǵa shaqqanda 103,3-ten 95,1-ge deıin tómendep, 7,9%-ǵa azaıǵan. Sonymen qatar erte dıagnostıkanyń úlesi 34,2%-dan 34,4%-ǵa deıin ósken.
– Búginde dárigerler jumysynyń negizgi baǵyty – aýrýdyń aldyn alý, skrınıngtik baǵdarlamalardy keńeıtý jáne dertti erte kezeńde anyqtaý. Óńirde halyqpen jumys isteýge erekshe kóńil bólinip keledi. Profılaktıkalyq sharalardyń mańyzdy bóligi – ashyq esik kúnderi. Jyldyń alǵashqy úsh aıynda oblysta osyndaı 3 is-shara ótkizilip, sonyń aıasynda 2 850 adam tekserýden ótti, – dedi ol.
Nátıjesinde 17 turǵynnan qaterli isikke kúdik anyqtalsa, taǵy 101 naýqasta obyrǵa deıingi jaǵdaılar tirkeldi. Barlyq azamat mamandardyń keńes alyp, qosymsha tekserýlerge jiberildi.
Onkologtordyń aıtýynsha, aýrý neǵurlym erte anyqtalsa, tolyq saýyǵyp ketý múmkindigi soǵurlym joǵary.
Eske salsaq, osyǵan deıin Qazaqstanda onkologııalyq aýrýdyń aldyn alýǵa arnalǵan qospa ázirlenip jatqany habarlanǵan.
