ShQO-da ónerkásiptik qaýipsizdik departamenti basshysynyń basy daýǵa qaldy
ÓSKEMEN. KAZINFORM – Shyǵys Qazaqstan oblysyndaǵy ónerkásiptik qaýipsizdik departamentiniń basshysyna qyzmettik ókilettiligin teris paıdalaný boıynsha aıyp taǵylyp otyr.
Bul vedomstvo taý-ken, metallýrgııa, munaı-hımııa jáne basqa da óndiris salalaryndaǵy kásiporyndarda memlekettik baqylaýdy qamtamasyz etedi. Biraq departament basshysynyń sol qaýipsizdikti qamtamasyz etpegeni anyqtaldy. Tekseristerden keıin ol talapqa saı emes kenishterdegi jumysty toqtatpaǵan.
– Óndiristik qaýipsizdikti qamtamasyz etý úshin ýaqtyly sharalar qabyldamaý - jumysshylardyń ómiri men densaýlyǵyna qaýip tóndiredi. Kenishterde pozıtsııalaý júıesi bolmaǵan. Bul ártúrli datchıkter men trekerlerden turatyn tehnologııalyq sheshim, olar shahterlerdiń jer asty jaǵdaıynda ornalasqan ornyn anyqtaýǵa múmkindik beredi. Tótenshe jaǵdaı kezinde ol adamnyń qaı jerde ekenin bilip, tabýǵa kómektesedi. Al qutqarýshylar ony jedel evakýatsııalaıdy, - dep habarlady Antıkordan.
Degenmen, qoldanystaǵy erejelerge sáıkes, pozıtsııalaý júıesiniń bolmaýy kásiporyndardyń jumysyn toqtatýdyń sebebi bola almaıdy. Antıkor jáne TJM ónerkásiptik qaýipsizdik komıteti bul erejeni kásiporyndardaǵy jumystardy toqtatýǵa tyıym salatyn eleýli buzýshylyqtarǵa jatqyzýdy josparlap otyr.
Al oblystyq departament basshysynyń áreketine qatysty quqyqtyq baǵany sot beredi. Alǵashqy sot otyrysy 18 qarashaǵa belgilengen. Eger sheneýniktiń kinási dáleldense, QR QK-niń 361-baby 1-bóligi boıynsha oǵan 2 000 aılyq eseptik kórsetkish kóleminde aıyppul salynady nemese 2 jylǵa bas bostandyǵyn shekteý nemese aıyrý jazasy taǵaıyndalady.
Eske salsaq, osyǵan deıin ShQO-daǵy aýrýhana memlekettik satyp alý portalynda ádeıi qatelik jiberip kelgeni habarlanǵan.
