ShQO-da on kúnde qarsy jolaqqa shyǵyp ketken 18 adam júrgizýshi kýáliginen aıyryldy
ShQO polıtsııa departamenti baspasóz qyzmetiniń málimetine súıensek, óńir boıynsha júrgizilip jatqan aldyn alý sharalary men túsindirý jumystaryna qaramastan kólik júrgizýshileri arasynda jol júrisi erejelerin óreskel buzatyndar tyıylmaı tur.
Taldaý kórsetkendeı, sońǵy 10 kúnniń ózinde ǵana 18 adam joldyń qarsy baǵytyna shyǵyp ketken.
Onyń barlyǵy júrgizýshi kýáliginen aıyryldy.
«Máselen, 13 shildede Óskemendegi Nazarbaev dańǵylynda «Kıa» markaly avtokóliktiń 33 jastaǵy júrgizýshisi qarsy baǵytta júrgen. Tártip saqshylary ony baıqaǵan soń birden toqtatty. Atalǵan buzýshylyqqa qatysty QR ÁQBtK-niń 596-baby 3-bóligimen ákimshilik hattama toltyryldy. Qala turǵyny alty aı merzimge kólik quraldaryn basqarý quqyǵynan aıyryldy», - delingen aqparatta.