ShQO-da oqýshylar arasyndaǵy álimjettik týraly vıdeoǵa qatysty polıtsııa túsinik berdi
ÓSKEMEN. KAZINFORM – Áleýmettik jelide Shyǵys Qazaqstan oblysynda oqýshylar arasyndaǵy álimjettik týraly vıdeo tarap ketti. Soǵan qatysty polıtsııa departamenti túsinik berdi.
Búgin bir top jasóspirimniń arasyndaǵy álimjettik týraly vıdeo áleýmettik jelide tarap, jurttyń qyzý talqysyna tústi. Onda bul oqıǵanyń Ulan aýdany Gerasımovka aýylynda bolǵany jazylǵan.
Alaıda ShQO polıtsııa departamentiniń ókilderi vıdeonyń osydan 2 jyl buryn túsirilgenin málim etti.
— Vıdeo 2023 jyly Gerasımovka orta mektebi aýmaǵynda túsirilgen. Sol kezde oqıǵaǵa qatysýshylarmen jáne basqa da oqýshylarmen profılaktıkalyq jumystar júrgizildi. Bul jasóspirimdermen mektep psıhology jeke sóılesti. Qazir olardyń ekeýi 10-synypta oqýyn jalǵastyryp jatyr. Al qalǵandary kolledjder men ýnıversıtetterge oqýǵa túsip ketti, - delingen aqparatta.
Eske salsaq, buǵan deıin Semeıde jasóspirimder altynshy synyp oqýshysyn soqqyǵa jyqqany habarlanǵan.